A comunidade galega en Madrid reuniuse para celebrar o 103 aniversario da Agrupación Artística Rosalía de Castro. Nun ambiente festivo e familiar, os "Rosalinos" conmemoraron máis dun século de dedicación á preservación das tradicións, a música e o baile tradicional no Centro Galego de Madrid.

Asomega, que xa mantivo un papel activo durante o centenario da agrupación, quixo estar presente novamente nesta efeméride. Esta relación constante reforza o compromiso da Asociación de Médicos Galegos coas entidades que manteñen viva a chama da identidade galega fóra das súas fronteiras.

No marco desta colaboración, Asomega Axuda fixo efectiva unha doazón á Agrupación Rosalía de Castro. Esta achega nace do compromiso adquirido pola entidade médica con motivo do recoñecemento ás Cantareiras e á poesía popular oral no Día das Letras Galegas 2025. A presidenta da Agrupación, Jovita Fernández, agradeceu expresamente a Asomega Axuda o seu apoio e a colaboración constante coa labor de difusión da cultura galega que realiza a entidade que dirixe.

A labor da Agrupación coincide plenamente co espírito desta homenaxe da RAG, que busca poñer en valor ás gardiás da lingua e a cultura transmitida por medio de cantigas e bailes. Figuras como Adolfina e Rosa Casás ou Eva Castiñeira personifican esa memoria viva que Asomega busca protexer apoiando a colectivos que, como os "Rosalinos", evitan que o noso patrimonio se perda no esquecemento.

Con esta efeméride, reafírmase que un pobo está máis vivo cando "CANTE o que lle ocorre", mantendo unha conexión inquebrantable entre a saúde das nosas institucións culturais e a identidade de Galicia.