O Hospital Álvaro Cunqueiro de Vigo foi o escenario do I Concurso de Ideas para a Humanización do Servizo de Farmacia da área Sanitaria de Vigo, unha iniciativa pioneira orientada a mellorar a experiencia tanto de pacientes como de profesionais a través de propostas innovadoras.

Representantes da dirección da Área Sanitaria e do Servizo de Farmacia, xurado do certame e profesionais gañadoras e participantes no concurso de ideas.

O primeiro premio na categoría de Humanización de Pacientes foi para a doutora Natividad Lago Riveiro pola súa proposta “Busquemos sinerxias”, centrada en abrir o Grupo de Investigación do Servizo de Farmacia ao Consello Asesor de Pacientes da área Sanitaria e a asociacións de pacientes, promovendo a súa participación activa no deseño e desenvolvemento de proxectos de investigación.

Na categoría de Humanización de Profesionais, o primeiro premio recaeu en Lucinda Pousada Martínez, coa súa proposta “Bookcrossing. Intercambio de libros”, unha idea que impulsa a reciclaxe e a lectura entre o persoal do servizo, favorecendo o diálogo, o compañeirismo e a creación dunha cultura compartida a través dos libros.

A entrega de premios contou coa presenza do subdirector de Humanización e Atención á Cidadanía, Francisco Jesús Represas, en representación do Xerente da área Sanitaria, así como da Subdirectora de Farmacia, Isabel Rey Gómez-Serranillos. Ambos destacaron o valor desta iniciativa como motor de cambio cara a unha sanidade máis próxima, empática e centrada nas persoas.

(De esqueda a dereita): Francisco Jesús Represas Carrera, subdirector de Humanización e Atención á Cidadanía; Natividad Lago Ferreiro, Servizo de Farmacia; Lucinda Pousada Martínez; Isabel Rey Gómez-Serranillos, subdirectora de Prestación Farmacéutica dá Área Sanitaria de Vigo; e Noemí Martínez López de Castro, xefa do servizo de Farmacia Hospitalaria.