O IIS Galicia Sur sitúa cinco proxectos na elite da IA médica nacional

O tecido científico galego obtivo unha notable representación na primeira edición dos Premios IA BIC (IA Best in Class) 2026, organizados por Gaceta Médica, Fundamed e a Cátedra de Innovación e Xestión Sanitaria da Universidade Rey Juan Carlos. O IIS Galicia Sur situouse entre as entidades máis destacadas da convocatoria ao obter dous dos nove galardóns e incorporar tres proxectos adicionais na fase final do proceso de selección.

En canto á distribución xeográfica, das nove distincións outorgadas nesta primeira edición, á parte das dúas de Galicia, catro recaeron en centros da Comunidade de Madrid, unha na Comunidade Valenciana, outra en Euskadi e unha nun grupo hospitalario privado de ámbito nacional.

O núcleo dos recoñecementos obtidos polo IIS Galicia Sur concentrouse no grupo de investigación IDARA (Intelligent Digestive & AI/AI Research Alliance), vinculado ao Servizo de Dixestivo do Complexo Hospitalario Universitario de Pontevedra (CHUP). O equipo, liderado polo doutor Juan Turnes, alzouse con dous recoñecementos grazas ao desenvolvemento de ferramentas baseadas en intelixencia artificial xerativa aplicada á contorna asistencial: 'Aicomta' e 'Gift'.

'Aicomta' foi galardoada na categoría de Apoio á Decisión Clínica polo seu deseño orientado á optimización das consultas médicas en tempo real. Pola súa banda, 'Gift' —desenvolvida en coordinación co OneHealth DataSpace do CESGA— obtivo o recoñecemento na área de Formación e Coñecemento Clínico pola súa función na capacitación médica especializada e a detección de necesidades formativas personalizadas.

A doutora Eva Poveda, directora científica do IIS Galicia Sur, sinalou tras a recollida dos premios que estes recoñecementos "poñen en valor o excelente traballo desenvolvido polo grupo IDARA e a súa capacidade para integrar a intelixencia artificial en proxectos orientados a dar resposta ás necesidades reais da poboación en saúde e a facilitar o labor dos profesionais sanitarios". Así mesmo, o doutor Turnes precisou a complementariedade de ambos os dous sistemas, detallando que mentres 'Aicomta' actúa como asistente na práctica clínica directa, 'Gift' achega unha metodoloxía de formación continua adaptada ao usuario.

Proxectos finalistas na convocatoria

A presenza da investigación do IIS Galicia Sur completouse coa selección de outros tres proxectos finalistas nas súas respectivas áreas. No apartado de Apoio á Decisión Clínica, o Grupo Pneumoloxía - NeumoVigo alcanzou la fase final con dúas iniciativas: o Proxecto DIOSA —un sistema desenvolvido en colaboración coa Universidade de Vigo para a xestión de prioridades e listas de agarda na apnea obstrutiva do sono— e o programa HAICC-COPD.

Por último, na categoría de Xestión Hospitalaria Intelixente, o Grupo i-Farma-Vigo figurou entre os finalistas con 'AmaLIA', un asistente virtual deseñado para ofrecer soporte técnico e optimizar a información local sobre medicamentos.