José Luis Mascareñas recibe o Premio Rei Jaume I de Investigación Básica

O profesor José Luis Mascareñas Cid, investigador do Centro Singular de Investigación en Química Biolóxica e Materiais Moleculares da USC (CiQUS), recibiu de mans de Felipe VI o Premio Rei Jaume I 2025 na categoría de Investigación Básica. 

O xurado internacional, no que participaron cinco premios Nobel, distinguiu o profesor Mascareñas polos seus "traballos pioneiros en química organometálica", especialmente por introducir reaccións catalizadas por metais no interior de células vivas. Esta liña de investigación, desenvolta no CiQUS, abre novas vías para a creación de ferramentas químicas con aplicacións en biomedicina e biotecnoloxía, e supón un recoñecemento ao valor da ciencia fundamental como xerme dos grandes avances.

Os Premios Rei Jaume I, considerados un dos máximos recoñecementos científicos en España, destacan anualmente a personalidades de excelencia en sete categorías. Nesta 37ª edición, o acto de entrega serviu tamén como plataforma para reforzar a mensaxe de apoio á ciencia e a investigación, en liña coa iniciativa "España Insert Coin", impulsada para fomentar o investimento privado en I+D+i como motor de progreso.

A concesión deste galardón ao profesor Mascareñas é recibida con enorme orgullo polo CiQUS, xa que “non só recoñece a excelencia científica individual, senón que tamén reforza a visibilidade e o compromiso do centro coa investigación de fronteira de impacto internacional”, destacan dende este centro da USC. “Este premio consolida unha traxectoria brillante, avalada por máis de 250 publicacións e distincións como unha ERC Advanced Grant do Consello Europeo de Investigación”, conclúen.